Día dos trabalinguas

O pasado 12 de novembro festexamos na biblioteca o Día do trabalinguas. O fixemos cun reto: recitar un trabalinguas infinito ate que a lingua non nos deixase continuar.

A actividade tivo un bo grupo de participantes que acudiron á biblioteca para deixar constancia do seu esforzo.

 25 N. Día Internacional da Eliminación da Violencia contra a Muller.

Durante toda a semana realizamos unha campaña na biblioteca escolar promovendo a participación do alumnado, que debía crear os seus propios lemas pola eliminación da violencia contra a muller. 

O papagaio

Xa está na biblioteca o número de novembro! 

Lembrade! O xornal da xente miúda chega á nosa biblioteca cada mes cheo de interesantes novas en diversas seccións: entrevistas, banda deseñada, xogos, arte, ciencia...

Feira científica 

O alumnado de 1º de ESO celebra na biblioteca escolar a súa Feira científica. 

Nos últimos 15 días o alumnado desta clase estivo traballando no proxecto "Life" que finalizou cunha feira na que o propio alumnado amosoulle ás familias o resultado do seu esforzo: maquetas, teatro, explicacións a través de infografías, experimentos e demostracións científicas foron algúns dos traballos levados a cabo o pasado venres na biblioteca.

Nesta narrativa o grupo profundou na orixe da vida. O fío condutor da narrativa foi a bióloga estadounidense Lynn Margulis, importante referente de esforzo e adicación.

 Días das bibliotecas

O día 24 de outubro celebrouse o Día das bibliotecas e, na biblioteca escolar, tiveron lugar varias animacións lectoras para conmemorar a data e achegar, dun xeito lúdico, o noso alumnado á lectura.

O equipo de profes que dinamiza a Biblioteca escolar aproveitou a celebración do Día das Bibliotecas, para facer varias animacións lectoras coas clases de educación infantil e os primeiros cursos de educación primaria. Ao longo da mañá foron pasando os diferentes grupos para escoitar a unhas contacontos moi especiais (Lorena, Teresa e Fani). Polo camiño cara a biblioteca había moitas caras de expectación entre os peques, xa que sabían que lles esperaba algo novidoso e moi sorprendente.

Unha vez situados nos seus postos e captada a súa atención, deixáronse levar polas magníficas historias que as nosas contacontos tiñan preparadas para eles e elas. Os contos seleccionados foron  «Barbillas y cosquillas» para educación infantil,  «Una cena monstruosa» para 1º EP e «Vivan as uñas de cores» para 2º e 3º EP.

Con estas dinámicas perséguese fomentar a lectura entre o alumnado e familiarizalo co uso da biblioteca coma un espazo aberto á súa disposición que lles permitirá vivir excitantes aventuras a través dos libros que poderán atopar nela.

ESO 1

BRIAN O CHINÉS

 Comezamos cun novo libro nas reunións do club ESO 1: Brian, o Chinés. O libro foi escollido polo grupo de alumnos e alumnas do club entre diferentes opcións.

Brian, o Chinés (Primeiro Premio de Novela Xosé Neira Vilas) é unha novela sobre un mundo de emocións gurgullante ao redor dun neno con síndrome de Down, dende os seus primeiros anos na escola ata a súa adolescencia. Durante este tempo, Brian vai sentíndose parte dun grupo -formado por amigos, mestres, familia…- no que se sinte cómodo e co que vive grandes experiencias.

Pero este percorrido non sempre é doado, ás veces debe enfrontarse a situacións problemáticas que van cambiar o rumbo dos seus días.

Esta novela foi escrita por David Daniel Vázquez Álvarez e ilustrada por Andrés Meixide; editada por Embora.

 Club de lectura ESO 2

Escarlatina, a cociñeira defunta.

Para iniciar as reunións deste curso escollimos este arrepiante libro escrito por Ledicia Costas, ilustrado por Víctor Rivas e editado por Xerais. 

Adentrámonos nunha viaxe ao mundo dos mortos onde non faltan ingredientes de aventura, misterio e moito humor.

 Club de lectura ESO 1

O papagaio

O xornal para a xente miúda chega cada mes á nosa biblioteca. Nesta ocasión traballamos con el no club de lectura de Secundaria, como primeiro traballo do curso.

Neste xirnal atopamos diferentes seccións sobre ciencia, historia, arte, música, banda deseñana, actualidade...

 Club de lectura EPO 1

Sesión do club de lectura EPO 1. 

 Ovelliña, dáme la

Outra contada no club de lectura de Educación Infantil! Desta volta puidemos gozar da lectura deste libro da colección demademora de Kalandraka. A autora é Isabel Minhós Martins e ilustra Yara Kono.

–Ovelliña, dáme la.

–Para que queres a miña la?
–Para facer un xersei e ficar ben abrigado.
Se tapo ben a barriga non estarei constipado.

Un texto rimado de estrutura encadeada, repetitiva e acumulativa; un recurso habitual nos contos de tradición oral. Un relato de inverno, para combater o frío.

Bufanda, medias, luvas e gorro para abrigarse ben no inverno. Coa la desta ovelliña protexerémonos do frío e recitaremos versos suaves e quentiños.

 

Sesión de contacontos en Infantil

Os tres porquiños

O alumnado do Club asistiu a unha xornada moi divertida na que traballaron con este conto popular adaptado por Xosé Ballesteros e ilustrado maravillosamente por Marco Somá, editado por Kalandraka.

E soprou, e soprou o lobo... e as casiñas de palla e de madeira esborrallaron. Pero, a casa de pedra?